कविता/रमा थापा
म भनूँ के तिम्रो बारेमा,
म लेखूँ के तिम्रो बारेमा ?
म कसरी तिमीलाई सीमित गरूँ मेरा शब्दमा
म सधैँ सोच्छु, तिमी को हौ ?
जसलाई म एक झल्को सम्झन्छु
अनि हरेक प्रश्न जवाफ बनिदिन्छ
म सधैँ अचम्म मान्छु, तिमी के हौ ?
जसलाई म एक क्षण स्मरण गर्छु
अनि असजिलो पनि सजिलो बनिदिन्छ ।।
म भनूँ के तिम्रो बारेमा,
म लेखूँ के तिम्रो बारेमा ?
म कसरी तिमीलाई सीमित गरूँ मेरा शब्दमा ?
म सधैँ सोच्छु, तिमी को हौ ?
त्यो– साधारणमा असाधारण
त्यो– सामान्यमा असामान्य
म सधैँ अचम्म मान्छु, तिमी को हौ ?
जसको धड्कन मेरो मुटुमा धड्किन्छ
जसको साहस मेरो आत्मविश्वास बनिदिन्छ ।।
म भनूँ के तिम्रो बारेमा,
म लेखूँ के तिम्रो बारेमा ?
म कसरी तिमीलाई सीमित गरूँ मेरा शब्दमा
म अझै सोच्छु, तिमी के हौ ?
म अझै अचम्म मान्छु, तिमी को हौ ?
लाग्छ, तिमी मेरी आमा
म तिम्रो सानो अंश, केवल सानो अंश
लाग्छ, तिमी मेरी आमा
म तिम्रो सानो अंश, केवल सानो अंश ।।
– रमा थापा
शनिबार, कात्तिक १८, २०७४ मा प्रकाशित
Leave a Reply